Naglabas ng paglilinaw ang Cebu Pacific kasunod ng viral violin incident ng Manila Symphony Orchestra.
Nitong Miyerkules, June 17, nag-post si Rona de Leon, production manager ng grupo na hindi pumayag ang CebPac na gawing carry-on baggage ang kanilang violins, kahit pa pinagbigyan na raw sila noon sa mga dating byahe nila sa nasabing airline.
Agad nag-viral ang litrato ng mga myembro ng Manila Symphony Orchestra kung saan hawak nila ang kanilang mga violin sa loob ng cabin.
“Cebu Pacific Air did not allow violins as carry-on and wanted us to check them in, which of course is NON-NEGOTIABLE. Our orchestra has travelled multiple times via CebPac as well as other local and international airlines, and this has never been an issue,” sabi ni de Leon sa Facebook.
Paliwanag naman ng CebPac, ang mga pasaherong may bitbit na musical instruments na lagpas ang sukat sa standard cabin baggage dimension ay dapat mag-avail ng additional service.
“We advise passengers carrying musical instruments that do not fit as hand carry items to purchase the Musical Instrument allowance through CEB Special Baggage,” sabi ng CebPac.
“The CEB Special Baggage can be purchased during the initial booking process using the CEB mobile app, after guests input their personal information,” dagdag pa nito.
Nagpaalala rin ang Cebu Pacific na dapat maayos ang packaging ng checked instruments.
“Instruments placed in soft cases or gig bags cannot be accepted for check-in,” sabi ng CebPac at idinagdag na tanging ang hard-shell cases lang ang papayagan upang hindi masira sa gitna ng byahe.
Sabi pa ng CebPac, ang mga pasaherong may dalang violin ay makakasakay pa rin naman sa eroplano, pero dapat pasok ito sa cabin baggage size limit ng 56cm x 36cm x 23cm.
“As for the violins that exceeded the limit, we advised them to remove the instruments from their cases. The case was checked through for free, and the passengers handcarried the instruments,” sabi ng CebPac.
“We hope this incident sheds light on the need for passengers to check the size limit of bags, instruments or sport equipment that they are bringing with them for their trip.”
